Në disa prej fshatrave të Korçës po krijohen hapësira të reja për prodhimin dhe promovimin e produkteve tipike të zonës.
Përmes projektit “Rrugët e Shijes”, një bashkëpunim i Fondit SHqiptar të Zhvillimit dhe Bashkisë Korçë, qendrat e disa fshatrave do të marrin një funksion të ri, duke krijuar mundësi për prodhimin e produkteve lokale në kushte të sigurta dhe për t’i sjellë ato më pranë vizitorëve.
Në Qatrom, kjo do të konkretizohet me “Shtëpinë e Qershive” – një hapësirë e dedikuar qershisë dhe nënprodukteve të saj, me ambiente për prodhim, degustim, workshop dhe një dyqan për produktet lokale.
Këto hapësira do të jenë pjesë edhe e një itinerari të ri turistik, ku vizitorët do të mund të shohin nga afër mënyrën se si përgatiten produktet, t’i shijojnë dhe t’i blejnë ato.
Një mundësi e re për banorët për të zhvilluar prodhimin vendas dhe për të rritur të ardhurat e familjeve, por edhe një mënyrë e re për të zbuluar fshatrat e Korçës përmes shijeve dhe produkteve të tyre.