Është nënshkruar sot në Korçë Memorandumi i Mirkuptimit midis Bashkisë Korçë dhe Fondacionit Shqiptaro-Amerikan për Zhvillim, Ministrisë të Kulturës dhe Ministrisë të Zhvillimit Urban dhe Turizmit për projektin e rëndësishëm të restaurimit dhe rijetëzimit të Pazarit të vjetër të Korçës. Të pranishëm në këtë ceremoni kanë qënë Ministrja e Kulturës Mirela Kumbaro, Zv.Ministri i Zhvillimit Urban dhe Turizmit Gjon Radovani, Bashkë Drejtorët e AADA (Fondacionit Shqiptaro-Amerikan për Zhvillim) Aleksandër Srapuli dhe Martin Mata, Kryebashkiaku Sotiraq Filo si edhe përfaqësues të institucioneve dhe arkitektë e urbanistë te shumtë të qytetit. Ky projekt i ri synon restaurimin e blloqeve të ndërtesave në zemër të Pazarit të Vjetër të Korçës, ku përfshihen çatitë, fasadat, ndriçimi dhe sinjalistika. Pazari i Vjetër është një ndër zonat më të rëndësishme në trashëgiminë kulturore dhe arkitekturore jo vetëm për qytetin e Korçës por edhe për Shqipërinë e Ballkanin. Rivitalizimi i pazarit është një hap i rëndësishëm në ruajtjen dhe trashëgimin e traditës por gjithashtu është edhe një hap më tepër drejt pasurimit të jetës kulturore dhe ekonomike të qytetit. Në fjalën e tij përshëndetëse Kryebashkiaku Filo vlerësoi punën e bërë deri tani dhe shprehu gadishmërinë për një bashkëpunim edhe më të frytshëm në të ardhmen për ti dhënë Korçës vëmendjen që meriton.
