“Korça e bukur” është iniciativa më e re e ndërmare nga bashkia për shtimin e gjelberimit në qytetin e Korçës. Qindra pemë do të shtohen në këtë sezon mbjelljesh në të gjitha lagjet e qytetit. Në çeljen e kësaj iniciative kryetari i bashkisë Niko Peleshi dhe stafi i tij janë shoqëruar simbolikisht nga vajzat fituese të konkursit Miss Korça 2010.
“Qyteti i traditave të bukura, rrugicave të bukura, shtëpive të bukura dhe vajzave të bukura meriton të jetë edhe qyteti i lulishteve dhe parqeve të bukura” , ka theksuar ndër të tjera kryebashkiaku në fjalën e tij.Vetëm në fillim të kësaj iniciative mbi 100 pemë janë mbjellë në Lagjen 4 të qytetit dhe 160 pemë të tjera në Lagjen 15. Në këtë lagje kryetari i bashkisë është shoqëruar nga aktorë dhe artistë figurativë të qytetit.
Fushata e mbjelljeve “Korça e bukur” do të vazhdojë në çdo skaj të qytetit ku shoqëruar nga qytetarë të moshave dhe profesioneve të ndryshme, veç shtimit konkret të gjelbërimit, bashkia do të përcjellë edhe mesazhin se për një qytet të bukur dhe të gjelbër duhet të kontribuojmë të gjithë.