E kemi quajtur qyteti i serenatave,qyteti i kalldrëmeve, qyteti i karnavaleve. Kemi filluar ta quajmë, qyteti i festave, i festës së birrës, panairit të fundvitit, festës së lakrorit. Në përfundim të Simpoziumit Ndërkombëtar të Skulpturës 2010, Korçën, mund ta quajmë me të drejtë edhe qyteti i skulpturave moderne. Kjo për vetë faktin se 16 skulpturave të dy viteve të kaluara, i shtohen edhe 8 skulpturat e Simpoziumit të Skulpturës së Parkut të këtij viti, duke e çuar numrin e tyre në 24, një numër mjaft i konsiderueshëm krahasuar me rajonin.
Në fillim të muajit korrik, ka përfunduar me sukses, me një ceremoni dinjitoze, Simpoziumi Ndërkombëtar “Skulptura e Parkut Korça 2010”, një aktivitet ku nga 80 konkurrentë nga vende të ndryshme të botës, u përzgjodhën nga juria ndërkombëtare 8 skulptorë të ardhur nga Bullgaria, Gjermania, Spanja, Italia, Siria, Bolivia, ndërmjet të cilëve edhe skulptori korçar Vasi Kolevica. Skulptorët, ashtu si edhe dy vitet e mëparshme, realizuan në natyrë, veprat e tyre ne gur, të cilat janë artistikisht mjaft të realizuara. Kryetari i Bashkisë Niko Peleshi i pranishëm në ceremoninë e mbylljes së këtij projekti theksoi se këtë koleksion do ta quajmë: “Galeria kontemporane e artit”. Tashmë qyteti ynë do të jetë pronari i vetëm i kësaj pasurie kulturore, të cilën do ta ndajë me turistët e shumtë që do të vizitojnë qytetin e Korçës. –Njëkohësisht, -ka nënvizuar Kryetari Peleshi, -misioni i secilit prej nesh që punon dhe do të punojë për këtë qytet, është që të ruajmë statusin e avangardës, për të qënë gjithmonë një hap më përpara dhe për të bërë diçka më shumë se qytetet e tjera.
Kryebashkiaku Peleshi falenderoi skulptorët pjesëmarrë, organizatorët dhe qytetarët pjesëmarrës në këtë ceremoni përmbyllëse. Një falenderim i veçantë shkoi edhe për qytetarët e Korçës, të cilët me mbështetjen dhe vlerësimin e tyre, motivuan këta skulptorë që gjatë një jave të qëndrimit të tyre në qytetin tonë, të njohin vlerat më të mira të Korçës.
Ky projekt i filluar në vitin 2008, do të vazhdojë edhe për dy vite të tjera, me synim që të realizohen 40 skulptura, të cilat do të vendosen në parkun “Rinia”, duke e kompletuar galerinë kontemporane të artit.
Çertifikatat për skulptorët, u dhanë nga Kryetari i Bashkisë Niko Peleshi dhe nga të tjerë njerëz të artit, kulturës e intelektualë të fushave të ndryshme të pranishëm në këtë ceremoni, të cilët shprehën vlerësimin e tyre për këtë projekt me vlera për qytetin tonë.