Bashkia Korçë, Qendra Kulturore “Vangjush Mio” në bashkëpunim me Shoqatën e Artistëve Figurativë të qytetit të Korçës organizojnë Koloninë Ndërkombëtare të Artistëve Figurativë “Ditët e Mios”. 36 Piktorë morën pjesë në edicionin e pestë të Kolonisë “Ditët e Mios”. Në të morën pjesë jo vetëm piktorë nga Shqipëria, Kosova, Maqedonia, Mali i Zi e Greqia, por edhe piktorë nga vende të tjera të Europës. Eksperienca e viteve të kaluara jep mundësinë për të menduar zgjerimin e gjeografisë së artistëve pjesëmarrës për t’i dhënë qytetit tonë vlerat dhe dimensionet që ai meriton. Koha për pjesëmarrësit në këtë koloni është 4 ditë gjatë të cilave piktorët realizojnë punimet e tyre në qytetin e Korçës dhe rrethinat e tij. Ky eveniment ka si qëllim promovimin e vlerave natyrore, kulturore dhe artistike të qytetit tonë si dhe pikat turistike të trevës – Voskopoja, Dardha, Vithkuqi, Bozdoveci, Kamenica etj.
Organizatorët venë në dispozicion të gjithë bazën materiale të kësaj kolonie dhe në përfundim të gjithë piktorët pjesëmarrës me një nga veprat e tyre pasurojnë fondin e Galerisë së Arteve “Guri Madhi”. Ekspozita çelet në ambjentet e Qendrës Kulturore ditën e fundit të këtij aktiviteti. Për piktorët Korça mbetet një studio e madhe, me hapësira për t’u eksploruar, befasuese për pasurinë që mbart e cila është mjaft frymëzuese për të ushtruar talentin e tyre. Aktiviteti që do të kthehet në një traditë të përvitshme synon jo vetëm vendosjen e urave të komunikimit mes artistëve por sidomos promovimin e vlerave të qytetit.