Firmoset marrëveshja e huamarrjes prej 100 milion lekësh, mes Bashkisë Korçë dhe Pro Credit Bank, e cila do të përdoret për investime në infrastrukturën e qytetit të Korçës.
Në ceremoninë e firmosjes së marrëveshjes Kryetari i Bashkisë së Korçës Niko Peleshi e vlësoi me mjaft rëndësi këtë hua, pasi ajo do t’i lejojë Bashkisë së qytetit të realizojë projektet e saj më të rëndësishme në përmirësimin e infrastrukturës së qytetit. Ky fond do të përdorët nga Bashkia përgjatë dy viteve, kryesisht në realizimin e projektit madhor të rivitalizimit të qendrës së Korçës.
Në Fazën e Parë do të bëhet transformimi i sheshit para Katedrales së qytetit, së cilës do t’i dyfishohet sipërfaqja duke e kthyer në një zonë mjaft miqësore dhe tërheqëse për këmbësorët. Ndërsa në Fazën e Dytë do të bëhet ndërtimi i Zonës Këmbësore sipas projektit fitues të studios gjermane, që fillon nga monumenti i Ushtarit të Panjohur deri tek sheshi i Grand Hotel. Njëkohësisht pjesë e kësaj kredie është edhe sistemimi në disa blloqe pallatesh për shkak të dëmtimeve nga sistemi i kanalizimeve. Gjatë firmosjes së kësaj marrëveshje, Drejtore Rajonale e Pro Credit Bank, Ada Përmeti, e vlerësoi Bashkinë e Korçës si pionieren e shumë iniciativave.
– Marrëveshja e sotme është një eksperiencë unike, -vijoi Drejtorja Përmeti, – e cila e ndihmon bankën për të kredituar edhe në të ardhmen investimet publike të Bashkisë Korçë. Për hartimin e termave të kësaj kontrate huamarrje, ofroi ekspertizën ligjore USAID. Ndaj një falenderim të veçantë Kryebashkiaku Peleshi i drejtoi edhe përfaqësuesit të USAID në Shqipëri Joseph C. Williams të pranishëm në këtë takim. Z.Williams ka marrë pjesë gjithashtu edhe në përurimin e informatizimit të Drejtorisë së të Ardhurave pranë Bashkisë Korçë për të cilën u shpreh se se kompjuterizimi i kësaj drejtorie do të rritë bazën e të ardhurave të Bashkisë Korçë në mënyrë që në të ardhmen Bashkia e Korçës të bëhet më e kreditueshme. “Shpresojmë që huamarja të shërbejë si model për bashkitë e tjera, në krijimin e partnershipeve të kreditueshme”, – vlerësoi ai.