Aksioni i Bashkisë Korçë për sistemimin e lulishteve dhe krijimin e sipërfaqeve të gjelbëruara aty ku mungojnë, është shtrirë në mjaft lagje të qytetit. Sot, i pranishëm në sistemimin e lulishteve dhe njërit prej shesheve mes pallateve në Rrugën “Partizani” të qytetit, ishte Kryetari i Bashkisë Niko Peleshi, i cili bëri të njohur nismën e Bashkisë “Jepi zgjidhje”, pjesë e së cilës janë edhe këto ndërhyrje. Kanë qenë inspektorë të Rajoneve Administrative të qytetit, të cilët në përputhje me nevojat e banorëve, kanë evidentuar dhe fotografuar problematikën e banorëve të kësaj zone, që do të pasohej me ndërhyrjen e menjëhershme të Ndërmarrjes së Shërbimeve Publike. Pas rehabilitimit të disa lulishteve përgjatë Rrugës “ Partizani” puna e kësaj ndërmarrje do të vazhdojë me krijimin e dy lulishteve të reja në bllokbanimin ku ka marrë edhe mbështetjen e banorëve të saj për ta ruajtur e mirëmbajtur këtë investim.
Kryebashkiaku Peleshi falenderoi për partneritetin dhe kontributin vullnetar të ofruar nga banorët e kësaj zone, duke bërë thirrje për respektimin e rregullave të jetës në komunitet, ku të gjithë së bashku duhet të kontribuojnë për një qytet më të mirë.