Më 6 Qershor, në qendër të qytetit të Korçës u zhvillua Festivali Ndërkombëtar i Karnavaleve, evenimenti më i rëndësishëm që organizohet për të dytin vit nga Bashkia e qytetit. Me këtë festë Bashkia e Korçës, shpalli çeljen sezonin turistik për vitin 2009, duke i paraprirë festave të shumta që organizohen gjatë sezonit veror .
Aktiviteti i përmasave të mëdha, i vetmi i këtij lloji në Shqipëri, gjallëroi në orët e mbrëmjes qytetin e Korçës, në të cilin u përfshinë mjaft fëmijë të veshur me petkun e karnavalit. Për veshjet dhe aksesorët e kësaj feste Bashkia u kujdes në mënyrë të veçantë duke bashkëpunuar me biznesin.
30 grupe karnavalesh nga Shqipëria, Maqedonia e Mali i Zi me mbi 700 pjesëmarrës, performuan me fabulat e tyre në sheshin kryesor të qytetit para Katedrales, për të vazhduar më tej parakalimin në rrugët dhe bulevardet kryesore të qytetit të Korçës, duke rikthyer nurin e dikurshëm të Karnavaleve të Korçës, festës popullore të identifikuar me emrin e qytetit. Nuk munguan në këtë festë, serenatistët me kitara në dorë, grupi i polenës me këmborët që gumëzhinin, këmbajkat, cirku i Tiranës me fëmijët akrobatë, plaku prej bore dhe babagjyshet e vegjël, maskat butaforike me koka kafshësh e njerëzish, grupet e minoritetit maqedonas, rom dhe grupi nga Prilepi i Maqedonisë me veshjet, ritet dhe ritmet muzikore që i karakterizojnë. Grupet e karanvaleve, spikatën për shumllojshmërinë e fabulave dhe të mesazhit që ato përcollën, të cilat u përzgjodhën me shumë kujdes nga stafi organizator. Impresionuese ishte edhe pjesëmarrja e trupës profesioniste të Teatrit të Korçës, të cilët ishin në krah të trupave të tjera pjesëmarrëse.
Rikthimi i kësaj feste popullore u mirëprit nga banorët e qytetit tonë, por njëkohësisht ajo tërhoqi vëmendjen e turistëve vendas dhe të huaj, duke rifituar statusin e festës simbol të qytetit.
Karnavalet e Korçës, janë pjesë e filozofisë së Bashkisë Korçë, për t’i dhënë qytetit një profil të veçantë, profilin “Korça, qyteti i festave”.