Ngritja e zhvillimi i një kompleksi të ri ndërtimi në Korçë, do të krijojë imazhin e një qyteti që rritet.
Duke pasur këtë vizion për zhvillimin urban Korçës, ditën e martë, në datën 24 mars, në Bibliotekën ″Th.Mitko″, Bashkia e qytetit prezantoi nismën e saj të parë të Partneritetit Publiko -Privat (PPP), e cila ka për qëllim, ndërtimin e një kompleksi banimi për strehimin në qytet.
Ky është një projekt ambicioz, i pari i këtij lloji në Shqipëri, ku Bashkia Korçë, duke vënë në dispozicion të partnerëve privatë, truallin prej 60 mijë m2, kërkon të bëjë të mundur ndërtimin e një kompleksi bashkëkohor banimi, i cili do të kënaqë kërkesat e kohës dhe të perspektivës për strehim.
Nisma u prezantua nga Kryetari i Bashkisë Niko Peleshi, në një tryeze ku morën pjesë përfaqësues nga Shoqata e Ndërtuesve dhe Arkitektëve, Agjensia Rajonale e Zhvillimit, Dhoma e Tregëtisë dhe Industrisë, urbanistë, bankat që ushtrojnë aktivitetin e tyre në Korçë etj.
Kjo nismë u vlerësua dhe gjeti mbështetjen e partnerëve lokalë. Gjatë takimit u diskutuan dhe u propozuan rrugë të ndryshme të realizimit të tij.
Ky projekt asistohet nga Instituti i Kërkimeve Urbane (IKU) me qendër në Tiranë në kuader të LGPA që ekzekutohet nga ARD (USA) me financim të USAID, me asistencën e IKU.