Bashkia Korçë në bashkëpunim me Institutin për Ruajtjen e Natyrës në Shqipëri (INCA) do të bëjnë të mundur instalimin e 20 shtyllave me ndriçues modernë tek lulishte “Themistokli Gërmenji”. Ky projekt ka për qëllim jo vetëm të kontribuojë për efikasitetin e energjisë në vend duke instaluar teknologjinë më të re, atë të përdorimit të llampave LED, por të sigurojë një qasje të re duke krijuar një model për tu ndjekur edhe për pjesë të tjera të ndriçimit publik. Zbatimi i një sistemi të ri ndriçimi në këtë lulishte do të sigurojë një cilësi më të mirë dhe do të promovojë një mënyrë të re të mbrojtjes të natyrës me teknologji miqësore ndaj mjedisit. Llampat LED që do të përdoren do të reduktojnë konsumin e energjisë në 63% duke krijuar një mjedis modern, miqësor dhe të shëndetshëm.
