Ditët e fundit nga ana e Drejtorisë Rajonale të Tatimeve Korçë është ushtruar kontroll, presion për vendosjen e gjobave marramendëse për tregëtarët që tregëtojnë në bankinat e tregut të lirë të qytetit të Korçës.
Gjatë këtyre kontrolleve të ushtruara është abuzuar duke ju thënë tregëtarëve që ka qënë kërkesa e Bashkisë Korçë për pajisjen e tyre të detyruar me kasa fiskale.
Nëpërmjet kësaj deklarate, duam t’ju bëjmë të ditur qëndrimin zyrtar të Bashkisë Korçë në lidhje me këtë çështje.
Edhe pse në parim Bashkia Korçë është pro vendosjes së kasave fiskale si një masë e nevojshme që do të çojë në uljen e informalitetit, në rastin konkret kur bëhët fjalë për pajisjen me kasa fiskale të tregëtarëve të pazarit jo vetëm që nuk jemi pjesë e këtij aksioni por jemi totalisht kundër vendosjes së kasave fiskale për bizneset që tregëtojnë në pazar.
Për këtë qëllim ne do t’i drejtohemi me një letër zyrtare Ministrisë të Financave për t’i kërkuar përjashtimin e këtyre bizneseve nga vendosja e kasës fiskale.
Është e papranueshme që të ushtrohen presione të tilla ndaj këtyre bizneseve duke spekulluar me emrin e Bashkisë Korçë, dhe duke i dënuar ata me gjoba të mëdha.
Në kushtet e krizës ekonomike që po kalon Shqipëria dhe të vështirësive të mëdha që po përjeton biznesi shqiptar dhe ai korçar në veçanti, këto masa do të sjellin veçse falimentimin e biznesit dhe rritje të shkallës të varfërisë për familjet e këtyre njerëzve që tregëtojnë në bankinat e pazarit, në të ftohtë e në të nxehtë, në shi dhe në diell për të siguruar bukën e familjeve të tyre.