Një përfaqësi e Klubit Rotarjan e kryesuar nga Presidenti i këtij klubi zhvilloi sot një vizitë në Bashkinë e Korçës.
Në takimin me Kryetarin e Bashkisë Niko Peleshi, të dy palët konfirmuan vazhdimin e bashkëpunimit mes tyre, një bashkëpunim ky i hershëm me Bashkinë e qytetit në fusha të ndryshme.
Krahas programeve të tjera që po zbatohen nga viti në vit , u diskutua edhe për bashkëpunimin në dy pista konkrete, pikërisht në shërbimin shëndetësor në drejtim të rikualifikimit të personelit dhe në fushën sociale, kryesisht në ndihmën që duhet t’i jepet moshës së tretë. Shërbimi social është ndër më prioritarët në programet e Bashkisë Korçë dhe për këtë janë hartuar projekte konkrete. Një ndër to është shtrirja e Qendrave Komunitare për Moshën e Tretë në çdo lagje të qytetit, sa më pranë banesës së këtyre njerëzve në nevojë, të cilët ndihen shumë të diskriminuar për shkak të mungesës së mjeteve financiare dhe vetmisë për të përballuar jetën.
Ky program i Bashkisë ka gjetur mbështetjen e plotë të Klubit “Rotary”, të cilët janë të vendosur t’i japin një dimension të ri bashkëpunimit të tyre me Bashkinë e qytetit edhe në fushën sociale.
Në takim u diskutua edhe për fusha të tjera të bashkëpunimit kryesisht ne rivlerësimin e traditave historike dhe kulturore të qytetit. Në mjaft drejtime Rotary ka dhënë kontribute të spikatura, ku jo vetëm intelektualët ndajnë përvojat e tyre, por kontribuojnë duke mbushur një nevojë të shoqërisë sonë për një jetë më humane e më sociale.