Në përgënjeshtrim të akuzave të bëra nga dega e Partise Demokratike, në datën 14.05.2009, se Bashkia nuk e ka vënë ujin në zjarr për Tregun e qytetit, dëshirojmë të informojmë opinionin publik të qytetit se Bashkia e Korçës ka bërë dhe po vazhdon të bëjë përpjekje të vazhdueshme dhe serioze për rivitalizimin dhe rikonstruksionin e plotë të Pazarit të Korçës.
Informojmë me kënaqësi se Komisioni Europian e ka kualifikuar projektin e Bashkisë Korçë “Për rivitalizimin e Pazarit”, si projektin e parë për financim dhe do të akordojë një fond prej 1 milion eurosh për zbatimin e këtij projekti, i cili jo vetem do të përmirësojë ndjeshëm kushtet e tregëtimit për tregëtarët dhe konsumatorët, por edhe do të mundësojë restaurimin e Pazarit, kësaj trashëgimie të rëndësishme kulturore.
Dega e Partisë Demokratike vazhdon të tallet me qytetarët e Korçës e udhëhequr nga parimi “Shpif, shpif se diçka do të mbetet”.
Taksat dhe tarifat vendore 2009 nuk janë rritur asnjë qindarkë, e vetmja risi e këtyre dy viteve të fundit ka qenë paketa e lehtësive fiskale për nxitjen e bizneseve të reja. Taksa e re e ndriçimit të tregut është një shpifje e mendjeve të pushtura nga ethet elektorale.
Taksat dhe tarifat e Bashkisë Korçë miratohen në Këshillin Bashkiak dhe ftojmë të verifikohet procesverbali i mbledhjes së këtij këshilli, ku taksat dhe tarifat 2009 janë miratuar me 100% të votave të këshilltarëve të majtë dhe të djathtë.
Eshtë e vërtetë që sot tregëtarët e vegjël mezi mbijetojnë por kjo jo për shkak të taksave të bashkisë, por sepse për shkak të politikave te qeverisë së Gerdecit, të ardhurat e qytetarëve nuk mjaftojnë për të plotësuar as nevojat me jetike. Dilni në treg dhe shihni sa është xhiroja ditore e tregëtarëve.
Teoria e qytetit social për Bashkinë e Korçës do të thotë qendër komunitare për të moshuarit, njësi për mbrojtjen e fëmijëve, mjete shkollore për fëmijët jetimë, grande dhe lehtësi fiskale për familjet në nevojë dhe të rinjtë e këtij qyteti, bursa për gjimnazistët e shkëlqyer, ilace falas për fëmijët romë dhe egjiptianë etj, një paketë projektesh konkrete, që synon, të zbutë plagët e një shoqërie që vuan nga korrupsioni qeveritar, papunësia dhe varfëria ekstreme.
Nëse shqetësoheni me të vërtetë për problemet e qytetarëve dilni dhe jepni llogari për premtimet e pambajtura, për papunësinë dhe varfërinë, për mungesën e ilaçeve në spitale, për shtimin e listave në dyqane, për përkrahjen sociale që nuk mjafton për të blerë ushqime për familjen as për dy ditë dhe për fëmijët që janë të detyruar të paguajnë librat e shkollës.