Nxënësit e shkollave 9-vjeçare u bënë protagonistë në Ditën Ndërkombëtare të Tokës, në datën 22 Prill .
Mesazhin “Ne jemi pjesë e Tokës” nxënësit e përcollën me punimet e tyre nga materiale të riciklueshme, nëpërmjet një ekspozitë – konkurs të hapur në Bibliotekën “Thimi Mitko” të qytetit. Është i dyti vit rradhazi që ky aktivitet organizohet nga Bashkia Korçë, me mbështëtjen e Drejtorisë Arsimore Rajonale, Korsel Sh.p.k, Sife, Federatës së Paqes Universale, Ndërmarrjes së Shërbimeve Publike etj. ”Ne jemi Pjesë e Tokës” është pjesë e programit ProMjedis, një nga programet më të reja dhe më të rëndësishme të Bashkisë Korçë.
Nxënësit, gjatë ekspozimit prezantuan punimet e tyre, dhe përcollën mesazhin se ”Të gjithë së bashku mund të kontribuojmë në ruajtjen e Tokës sonë dhe në mbrojtjen e mjedisit përreth…”
Juria e ngritur me përfaqësues nga institucione të ndryshme, vlerësoi angazhimin e nxënësve në këtë projekt.
Shkolla më e mirë e vitit 2009 është shpallur “Sevasti Qiriazi”, e cila perveç dhuratave dhe çertifikatës, ka marrë edhe globin simbolin e kësaj dite, i cili do të qëndrojë për një vit në ambientet e kësaj shkolle. Njëkohësisht, të gjitha shkollat pjesëmarrëse kanë marrë si dhurata, poçe me lule dhe çertifikatën e pjesëmarrjes. Të gjitha punimet do të qëndrojnë për një javë në bibliotekën e qytetit.