Ditën e mërkurë, në datën 15 prill, tek Galeria “Guri Madhi”, piktori lezhjan Pashk Përvathi, çeli ekspozitën e tij vetjake, të mundësuar nga Bashkia Korçë dhe Qendra Kulturore “V.Mio”.
Kjo është ekspozita e parë e një piktori jokorçar, e cila në qendër të të gjithë pikturave të saj ka Korçën, bukuritë natyrore dhe arkitektonike të saj.
Në prezantimin e ekspozitës së tij, piktori Përvathi nënvizoi se frymëzimi i parë për të, kanë qenë veprat e Mios së madh dhe më pas, bukuritë e qytetit të Korçës, të cilat ai ka mundur t’i admirojë veçanërisht këto dy vitet e fundit pas pjesëmarrjes së tij në “Koloninë e Piktorëve” të organizuar nga Bashkia Korçë.
Përvathi është autor i dhjetra ekspozitave në Shqipëri dhe galeritë europiane.
Në vitin 2006 ai është nderuar nga Presidenti i Republikës me Urdhërin: “Naim Frashëri”.