Bashkia e Korçës ka aplikuar projektin e saj më të fundit në mbështetje të krijimit të pavarësisë ekonomike për 10 familje në nevojë në qytetin e Korçës. Familjet do të ndihmohen për ngritjen e një biznesi të vogël familjar nëpërmjet një grandi prej 50 mijë lekësh të ofruara nga Bashkia e Korçës me mbështetjen e UNICEF, ndërkohë që 50 mijë lekë të tjera në formën e një kredie të butë me 4% interes, janë mundësuar nga TABITA, Organizata Humanitare në Ndihmë të Familjeve në Nevojë.
Krahas ndihmës për ngritjen e biznesit familjar, është mjaft e rëndësishme krijimi i kushteve që fëmijët e këtyre familjeve të ndjekin shkollën, e cila është kushtëzuar nga bashkia nëpërmjet një kontrate të lidhur me familjet përfituese.
Familjet janë përzgjedhur nga skema e Ndihmës Ekonomike, duke e lehtësuar këtë skemë nga viti në vit. Aktualisht përfituesit po trajnohen për ngritjen e biznesit të tyre.
Projekti do të aplikohet edhe për vitin që vjen për 20 familje të tjera, të cilat që këtë vit kanë marrë aprovimin e UNICEF.