Serenatat korçare nën një interpretim ndryshe

Më 17 maj, Qendra Kulturore “V. Mio” me mbështetjen e Bashkisë Korçë
organizoi edicionin e dytë të Koncertit “Zërat e Serenatës”.

Këtë herë, serenata korçare ka ardhur për publikun e zgjedhur nëpërmjet
zërit të sopranos Zhuljeta Sheremeni dhe të riut Gjergji Mani, por edhe
këngëtarëve të ftuar nga Tirana, të mirënjohurës mexosoprano Vikena
Kamenica dhe tenorit të Teatrit të Operas dhe Baletit Aleksandër Rrapi.

12 këngët më të bukura të serenatës të kënduara me mjaft mjeshtëri herë
solo e herë duet e trio u duartrokitën nga publiku. Koncerti Zërat e
Serenatës tregoi edhe një herë se pavarësisht nga mënyra e të kënduarit
serenata korçare mbetet mjaft e dashur për të gjithë. Këngët u
përzgjodhën dhe u orkestruan nga kompozitori Josif Minga.