Duke synuar forcimin e bashkëpunimit me bizneset lokale, si një faktor kyç për zhvillimin ekonomik të qytetit, Bashkia e Korçës organizoi takimin e parë me përfaqësuesit e bizneseve që zhvillojnë aktivitetin e tyre në qendër të qytetit.
Gjatë bashkëbisedimit me Kryetarin e Bashkisë Niko Peleshi, perfaqësuesit e bizneseve i bënë të njohura problemet dhe kërkesat e tyre si dhe u diskutua për caktimin e ditës së pushimit për njësitë tregëtare në qytet dhe shtrirjen e orarit të funksionimit të tyre edhe gjatë pasdites.
Një çështje e rëndësishme e këtij takimi ishte edhe koordinimi i përpjekjeve në luftën ndaj informalitetit dhe konkurrencës së pandershme. Nëpërmjet nismës “Denonco informalitetin”, Bashkia ka vënë në dispozicion numrin e telefonit 251844, në të cilin mund të denoncohet nga çdo qytetar një rast informaliteti, ku brenda 24 orëve, personat përgjegjës do të bëjnë verifikimin e rastit. I gjithë procesi do të monitorohet online në faqen e Bashkisë www.bashkiakorce.gov.al” si dhe tek portali elektronik në hyrje të institucionit të Bashkisë së Korçës.