Shkolla 9-vjeçare “Nuçi Naçi” është shkolla e parë pilot, në të cilën Bashkia e Korçës filloi fushatën e parë sensibilizuese me veprime konkrete për rehabilitimin e sipërfaqeve të gjelbra e mjediseve çlodhëse në territoret e shkollave. Bashkia nëpërmjet Ndërmarrjes së Shërbimeve Publike, realizoi një ndërhyrje të shumëfishtë duke sistemuar bordurat e mjediset çlodhëse në oborrin e kësaj shkolle. Në lulishtet si dhe përgjatë rrethimit të saj u mbollën 45 drurë, u vendosën koshat e mbeturinave si dhe stolat çlodhës. Drejtoria e shkollës ka marrë përsipër që në orët e lira, të aktivizojë nxënësit në mirëmbajtjen e mjedisit. Në këtë mënyrë, do të jenë vetë nxënësit, që do t’i mirëmbajnë këto mjedise të pastra dhe të gjelbëruara.
Puna për sistemimin e lulishtes do të vazhdoje në Gjimnazin “Raqi Qirinxhi” , e cila është përzgjedhur nga Bashkia e qytetit si shkolla e dytë pilot.