Çelet sot në Parkun “Rinia”, Kampi veror për fëmijët e qytetit, një organizim i Bashkisë së qytetit i mbështetur nga Terre des Hommes dhe Save the Children. Një vizitë e Kryetarit të Bashkisë Niko Peleshi, gjallëroi më shumë fëmijët, të cilët falenderuan kryetarin për kushtet e krijuara. Kryetari Peleshi siguroi se programet sociale për fëmijët janë në qendër të vemendjes së bashkisë edhe për të ardhmen. Në vitin e tretë të organizimit të këtij kampi, me sloganin “Qyteti gjithëpërfshirës”, janë përfshirë 150 fëmijë prej të cilëve rreth 10 fëmijë me aftësi të kufizuara dhe rreth 30% prej tyre janë nga komunitetet rome dhe egjiptiane. Ky është viti i parë që fëmijet që do të frekuentojnë këtë kamp, nuk do të paguajnë dhe përveç argëtimit, lojrave zbavitëse me profesionistë dhe sporteve të ndryshme, do t’u ofrohet ushqim falas.
Kampi do të qëndrojë i hapur nga data 1 korrik deri në datën 31 gusht. Ai fton të bëhen pjesë të tjerë fëmijë, të cilët kanë dëshirë të argëtohen në shoqëri me njëri-tjetrin dhe të mësojnë nga profesionistë.