Tempulli i Artit në Korçë do të shndërrohet me investimin e qeverisë shqiptare në një teatër modern, i cili do t`i përgjigjet kërkesave dhe standarteve të kohës. Ndërhyrja në pjesën e skenës dhe të ambjenteve ndihmëse të saj do të jetë kryesisht në aspektin ristrukturues përsa i përket rifiniturave, të cilat janë tashmë shumë të degraduara, por dhe në drejtim të rritjes së numrit të hapësirave ndihmëse për aktorët e deputuesit, duke e pasuruar me dhoma të reja përgatitore dhe grimi. Trajtimi i interierit të sallës parashikohet të realizohet me materiale të çertifikuara, që realizojnë parametrat akustike sikurse dhe komoditetin e spektatorit. Ndërhyrja në hollin e teatrit do të jetë po aq radikale sa edhe tek salla. Do të ndërtohen shkallë të reja, njëra prej të cilave është konceptuar monumentale me rampa të gjera dhe me lucionar sipër saj, i cili ia shton magjinë dinamikës së shkallës. Të gjitha impiantet e kondicionimit , ngrohje – ftohjes, elektrikut, audio-video, janë parashikuar me parametra bashkëkohorë. Në pjesën e pasme të teatrit është parashikuar të ndërtohet teatri i kukullave, me kapacitet 91 spektatorë. Teatri i kukullave do të realizohet duke shfrytëzuar pjesërisht objektin ekzistues, nëpërmjet ndërhyrjes në strukturën e dyshemesë së saj. Ndërsa pjesa e hollit shfaqet si strukturë e re, që do t`i bashkëngjitet ekzistueses. Kjo, do të krijojë mundësinë që edhe fëmijët të kenë skenën e tyre.Trajtimi i fasadës kryesore është konceptuar me frymën metaforike arkitektonike të simbolikave të teatrit , e "Gëzuara" dhe e "Mërzitura", të cilat mbartin në vetvete simbolikën e komedisë, dramës dhe tragjedisë.
