Për të tretin vit radhazi nxënësit e Degës së Pikturës të Shkollës “Tefta Tashko Koço” kryejnë praktikën mësimore, duke hijeshuar dhe dekoruar fasadat e kopshteve të qytetit. Kjo iniciativë është mbështetur dhe përkrahur nga Ndërmarrja e Shërbimeve Mbështetëse të Arsimit dhe Çerdheve pranë Bashkisë Korçë. Kryebashkiaku Sotiraq Filo ka ndjekur nga afër punën e talentuar të këtyre nxënësve për transformimin e fasadës të Kopshtit nr.6, në Lagjen 8 të qytetit. Në fjalën e tij, përshëndeti dhe vlerësoi stafin e kësaj shkolle për impenjimin dhe kontributin e frytshëm, duke i bërë më mikpritëse dhe atraktive ambjentet e edukimit të brezit të ri. Gjithashtu shprehu angazhimin e Bashkisë Korçë për zbatimin e projekteve të tjera konstruktive në kopshte, shkolla dhe hapësira të gjelbra në funksion të fëmijëve. Në shenjë falenderimi kryebashkiaku u dhuroi praktiktantëve të kësaj shkolle sete pikture, duke u uruar suksese të mëtejshme në proçesin mësimor. Gjatë viteve të kaluara nëpërmjet kësaj praktike janë zbukuruar fasadat në pjesën më të madhe të kopshteve, iniciativë e cila do të vazhdojë paralelisht edhe në kopshtin Rom “Lulet e Vogla”, Kopshtin nr. 1, Kopshtin nr. 8 dhe më gjerë.
