U përmbyll edicioni i 7-të i Simpoziumit Ndërkombëtar të Skulpturave 2016 në Korçë, ku artistët pjesëmarrës nëpërmjet kontributit të tyre i dhuruan qytetit 6 vepra të reja, të cilat do t`i bashkangjiten koleksionit paraardhës. Pas prezantimit të skulpturave të gdhendura në gur dhe në dru, të cilat ofrojnë forma të ndryshme dhe të veçanta të shprehjes artistike, ceremonia vazhdoi me shpërndarjen e çertifikatave për artistët pjesëmarrës. Korça është qyteti i vetëm në Shqipëri, i cili i jep jetë artit të bukur të gdhëndjes, duke krijuar kështu një muze pamor bashkëkohor si dhe pasurimin e kulturës e mentalitetit artistik me një dimension të ri të menduari dhe krijuari në skulpturë. Çdo vit nëpërmjet veprimtarive të shumta promovohen krahas artistëve të afirmuar edhe talente të reja, për të ndihmuar në edukimin e brezit të ri. Ky eveniment shumë i rëndësishëm, është kthyer tashmë në një traditë për qytetin sa identifikuese aq edhe përfaqësuese në të gjithë rajonin.
