PANAIRI I PRANVERËS
Prill 2019
Në çelje të sezonit Pranveror, Bashkia Korçë organizon "Panairin e Pranverës", i cili shoqërohet nga një sërë aktivitetesh të ndryshme artistike e kulturore.Në Zonën Pedonale të qytetit, nuk mungojnë aktivitetet për fëmijë, ekspozitat, grupet e muzikës dhe të kërcimit, për të vazhduar me koncerte të ndryshme. Pjesë e aktiviteteve të larmishme që zhvillohen përgjatë dy javëve, është edhe Panairi i Poçerisë, që zhvillohet tek sheshi përpara Katedrales “Ringjallja e Krishtit”, gjatë të cilit ekspozohen dhe tregëtohen punime interesante të poçerisë.
KARNAVALET E KORÇËS
Qershor 2019
Korça e njohur për Karnavalet e famshme, e ka rikthyer këtë traditë duke e shndërruar në një nga festat më të bujshme të qytetit. Trupa karnavalesh vendase dhe të huaja parakalojnë me madhështi para mijëra qytetarëve dhe vizitorëve, që bëhen pjesë e kësaj feste të paharrueshme. Nuk ka Karnavale, pa “Karnavalet e Korçës”.
FESTA E BIRRËS
Gusht 2019
Aktivitetet e shumta të verës kulmojnë në muajin gusht, me festën më të madhe në qytet, “Festën e Birrës”, e cila organizohet për të dymbëdhjetin vit rradhazi. Mijëra vizitorë vendas dhe të ardhur nga jashtë Shqipërisë kanë mundësi të shijojnë për 5 netë birrën e ftohtë, produktet tradicionale të Korçës, muzikën më të mirë. Argëtim, show, ritëm deri në orët e para të mëngjesit. Festa e birrës… vetëm në Korçë.
www.festaebirres.com www.korcabeerfest.com
FESTA E LAKRORIT
Korrik 2019
Festa e Lakrorit organizohet çdo vit nga Bashkia Korçë me qëllim gjallërimin e jetës turistike si edhe ruajtjen e traditës së gatimit tradicional edhe në atraksionet turistike që i bashkohen qytetit të Korçës. Gjatë festës, amvisat demonstrojnë përgatitjen e lakrorit para syve kureshtarë të vizitorëve që mezi presin të shijojnë lakrorin e sapopjekur në saç. Gjatë gjithë aktivitetit, nuk mungojnë edhe tingujt e serenatave korçare, duke gjallëruar akoma më shumë atmosferën festive.
SIMPOZIUMI NDËRKOMBËTAR “SKULPTURA E PARKUT ”
7 – 16 Korrik 2019
Ky aktivitet i rëndësishëm ndërkombëtar realizohet përgjatë dy javëve të muajve të verës në Korçë. Skulptorë nga vende të ndryshme të botës vijnë në qytetin e Korçës dhe skalitin veprat e tyre në gur. Të gjitha skulpturat e tyre i dhurohen qytetit. Organizimi i përvitshëm i këtij simpoziumi, synon ta kthejë parkun “Rinia” të qytetit në një muze të hapur të artit bashkëkohor.
Shtator- Tetor 2019 Festivali i Vjeshtës do të jetë një projekt tjetër që do t'i shtohet kalendarit të eventeve të Bashkisë Korçë, i cili do të konsistojë në një numur të madh aktivitetesh që do të ndodhin për një muaj në këtë qytet. Gjatë periudhës shtator- tetor do të këtë mjaft aktivtete kulturore, artistike dhe tradicionale për të përçuar vlerat që ky qytet mbart si dhe për të përçuar mesazhin se në Korçë festohet gjatë gjithë vitit. Bukuria e vjeshtës do të shoqërohet dhe me tingujt e muzikës shqiptare ku këngëtarë të mirënjohur do të përformojnë tek skenat e Pazarit të Vjetër, Korçë dhe Zonës Kembësore. E veçanta e këtij festivali do të jetë dhe dekori specifik dhe i personalizuar i realizuar me mjeshtëri nga stafi i Bashkisë.
KORÇA KULT
29 Shtator- Java e parë e tetorit 2019
Në kuadrin e Ditës Kombëtare të Trashëgimisë Kulturore, Bashkia Korçë do të organizojë Festivalin Multikulturor “Korça Kult”, i cili ka për qëllim promovimin e vlerave të trashëgimisë kulturore të Korçës. Programi do të përfshijë një larmi aktivitetesh të ndryshme artistike, kulturore, sportive, për të gjitha grupmoshat si vizita falas në muzeumet e qytetit, ekspozita nga piktorë të rinj të talentuar, ekspozita fotografike, nata e poezisë, aktivitete argëtuese për fëmijët, lojra sportive etj.
FESTA E MOLLËS
Java e parë e Tetorit 2019
Festa e Mollës, e cila do të organizohet për herë të tretë nga Bashkia Korçë, ka si qëllim promovimin e produktit vendas, mollës dhe nënprodukteve të saj. Mbledhja e mollëve nëpër ferma të ndryshme në zonat që dallohen për prodhimtarinë e mollës, krijon një mundësi argëtimi për turistët vendas dhe të huaj si edhe gjallëron jetën në njësitë administrative që i bashkohen Korçës. Me pjesëmarrjen e fermerëve të rajonit, realizohet një panair, ku të gjithë pjesëmarrësit reklamojnë mollët si edhe produkte të tjera kulinarie si verë, reçel, liko, prevede, ëmbëlsira me mollë etj.
KOLONIA NDËRKOMBETARE E PIKTORËVE "DITËT E MIOS"
25- 28 Tetor 2019
Kolonia e piktorëve, që zhvillohet në Korçë mban emrin e piktorit të famshëm korçar, Vangjush Mio. Piktorë nga Shqipëria dhe jashtë saj janë tashmë pjesë e kësaj kolonie. Për piktorët, Korça mbetet një studio e madhe, me hapësira për t’u eksploruar, befasuese për pasurinë që mbart, e cila është mjaft frymëzuese për të ushtruar talentin e tyre. Aktiviteti synon jo vetëm vendosjen e urave të komunikimit mes artistëve, por sidomos promovimin e vlerave të qytetit. Piktorë nga vende të ndryshme të botës janë pjesë e kësaj kolonie, që tashmë ka zënë një vend të rëndësishëm në aktivitetet kulturore në qytet dhe jo vetëm.
KORCA OPEN AIR
Fund Dhjetori 2019
Bashkia Korçë do të organizojë gjatë muajit Dhjetor 2018 aktivitetin “Korça Open Air”, në të cilën do të marrin pjesë parashutistë profesionistë nga Aeronautika Shqiptare, të cilët do të garojnë mes tyre duke organizuar fluturime të lira në qytetin e Korçës. Për të gjithë të apasionuarit pas sporteve në natyrë, do të zhvillohen fluturime dyshe me ndihmën e profesionistëve. Në përmbyllje të aktivitetit do të realizohet Ceremonia zyrtare e ndarjes së çmimeve për fituesit e aktivitetit “Korça Open Air 2018”.
PARADA E BABAGJYSHIT
30 Dhjetor 2019
Çdo 30 Dhjetor, Babagjyshi i vitit të ri me karrocë dhe shumë babagjyshë të tjerë të vegjël bëjnë paradën tradicionale në bulevardet kryesore të qytetit, që finalizohet në sheshin para Katedrales “Ringjallja e Krishtit”. Dhurata, muzikë, argëtim dhe surpriza për fëmijët në prag të ndërrimit të viteve.
PANAIRI I FUNDVITIT
Dhjetor, 2019
Me sloganin “Festojmë edhe në dimër!”, dhe nën dekorin e mrekullueshëm që vesh qytetin në muajin dhjetor, Korça organizon Panairin e Fundvitit, të vetmin në Shqipëri. Atmosferës festive, i shtohen shtëpitë e drurit, lodrat, ëmbëlsirat, pijet tradicionale (vera e nxehtë), mollët e pjekura, gështenjat, muzika në shesh, ekspozita të hapura e të tjera. Në qendër të qytetit, Shtëpia e Babagjyshit mirëpret të gjithë fëmijët ta vizitojnë e të bëjnë foto me babagjyshin. Pista e Patinazhit është një tjetër mënyrë argëtimi për të gjithë ata që zgjedhin t’i festojnë në Korçë festat e fundvitit.