Konkursi Ndërkombëtar i Fotografisë "Sotir"

Konkursi ndërkombëtar për fotografë të rinj “SOTIR”, i cili organizohet prej disa vitesh në qytetin e Korçës, synon të pëforcojë një traditë të re të zhvillimit dhe promovimit të fotografisë dhe vlerave të saj në Shqipëri. Ky projekt kulturor sjell së bashku fotografë të rinj shqiptarë dhe të huaj për të promovuar fotografinë si një formë e shprehjes dhe dinamikës së artit bashkëkohor e shoqërisë në zhvillim.
 
Aktiviteti sjell të parin Çmim Ndërkombëtar të Fotografisë dedikuar të rinjve në Shqipëri që prej vitit 2008. Ky aktivitet mban emrin e Kristaq Sotirit (1883 – 1970), fotografit korçar i cili u formua si fotograf në SHBA, krijimtaria e të cilit portretizoi qytetarinë shqiptare, jetën kulturore dhe protagonistët e saj sipas stilit amerikan te kohës. Ai është një nga profesionistët e parë që ndërtuan traditën e fotografisë në Shqipëri bashkë me emra të tjerë të mëdhenj të fotografisë shqiptare.
 
Edicioni i parë i konkursit për fotografë të rinj “SOTIR” hapi dyert në Korçë në 15 Maj 2008. Bashkia Korçë në vazhdën e promovimit të vlerave të trashëgimisë dhe traditës me dashamirësi mikpriti këtë event të rinjsh të organizuar nga të rinj. Çmimi ndërkombëtar për fotografë të rinj SOTIR ngjall interes në publik dhe promovon bashkë me aktivitetin edhe vlerat e qytetit të Korçës.
 
Dëshirojmë që kjo traditë të vazhdojë edhe në vitet në vazhdim me pretendimin e një aktiviteti më të plotë e më të gjerë, gjithmonë në shërbim të kulturës artit dhe trashëgimisë duke synuar:
  • Të promovojë fotografinë si një formë e shprehjes dhe dinamikës së fotografisë, artit bashkëkohor dhe shoqërisë në zhvillim.
  • Të promovojë vlerat e artit dhe kulturës së trashëguar nëpërmjet ridimensionimit në forma bashkëkohore.
  • Të mbështesë artistë të rinj.
  • Të decentralizojë zhvillimin e aktiviteteteve artistike ndërkombëtare nga kryeqyteti për në qytete si Korça me potencial të spikatur kulturor.

Edicioni i IV "Çmimi Sotiri 2011"

Në  datën 24 Qershor 2011 në galerinë “Guri Madhi” në Korçë u hap edicioni i katërt i “Çmimit Sotiri”, konkursi ndërkombëtar për fotografë të rinj. Ekspozita e këtij viti u organizua në bazë të konceptit të fotografes franceze Anouck Durand me titull “Propaganda intime: albumi i familjes”. Morën pjesë 15 artistë nga 11 shtete të botës, të cilët me veprat e tyre sollën tendencat e ndryshme, që shënojnë ecjen e fotografisë bashkëkohore sot në botë. Tematikat dhe tendencat e larmishme, si: fotografia dokumentare, fotografia dokumentare e një realiteti të krijuar, fotografia onirike, fotografia konceptuale, dhe fotografia e ndërthurur me videon e bëjnë “Çmimin Sotiri” gjithnjë më të rëndësishëm, për prurjen e risive në fotografi dhe artet pamore në Shqipëri.

Në mbledhjen e saj në datën 25 Qershor 2011, juria e konkursit, e përbërë nga Vladimir Topi, drejtor i Pallatit të Kulturës “Vangjush Mio” në Korçë, Anouck Durand, fotografe – Francë dhe Soela Zani, fotografe – Shqipëri,  vendosi: “Çmimi Sotiri 2011”, që akordohet ng Bashkia Korçë,  t’i jepet artistes Alicja Dobrucka nga Polonia me serinë  ‘Ti më pëlqen, më pëlqen shumë’, për konceptin dhe ndjeshmërinë e lartë që mbartin fotografitë e saj.

Juria vendosi që t’u japë Çmimi Sotiri II, një çmim honorifik, edhe dy artisteve të tjera për: serinë prej 10 fotosh të Ayumi Tanaka nga SHBA dhe serinë ‘Të panjohur të afërt’ të Hemya Moran nga Israeli, për risinë dhe realizimin me cilësi të lartë që sjellin seritë e tyre.

Po në datën 25 Qershor, Anouck Durand mbajti një konferencë mbi fotografinë e familjes në Shqipëri gjatë periudhës 1948 - 1988 në një nga sallat e bibliotekës së qytetit.  

Aktiviteti u mbështet nga Bashkia Korçë, Ambasada Franceze në Tiranë, Aleanca Franceze Korçë dhe Qendra Kulturore Lindart në Tiranë.

Artistët pjesëmarrës në Konkursin Ndërkombëtar të Fotografisë “Sotiri 2011”

  1. Alicja Dobrucka, Angli
  2. Arjana dhe Klodiani , Shqipëri.
  3. Asaf Gram Hcohen, Izrael.
  4. Ayumi Tanaka, SHBA.
  5. Brilanta Kadillari, Shqipëri.
  6. Sabrina Damiani , Kroaci.
  7. Geneviève Thauvette, Kanada.
  8. Hemya Moran, Izrael.
  9. Lucía Luna, Argjentinë.
  10. Maria Joao Dos Reis, Portugali.
  11. Maria Kapajeva, Estoni.
  12. Marta Gut, Poloni.
  13. Martje Zandboer, Hollandë.
  14. Orli Perel Nir, Izrael.
  15. Alketa Ramaj, Shqipëri.

Artistët pjesëmarrës në Konkursin Ndërkombëtar të Fotografisë “Sotiri 2010”

  1. Alexander Mendelevich, Izrael
  2. Anastasia Markelova, Rusi
  3. Annabelle Craven-Jones, Angli
  4. Anu Ramdas, Danimarkë
  5. Clara Bahlsen, Gjermani
  6. Claudia Neuhaus, Gjermani
  7. Erilda Selaj, Shqipëri
  8. Fabian Bechtle, Gjermani
  9. Iva Sykorova, Sllovaki
  10. Lia Chavez, SHBA
  11. Sara Andersdotter, Suedi
  12. Sara Trouche, Francë
  13. Stefanie Manns, Gjermani
  14. Torben Hoeke, Gjermani
  15. Yehuda Swed, Izrael
back