Çmimi “Sotiri 2011” sjell në Korçë fotografë të rinj nga e gjithë bota
Në muajin qershor, në Galerinë e Arteve “Guri Madhi” në Korçë u çel ekspozita me punët e realizuara nga fotografë të rinj nga e gjithë bota, pjesëmarrës në edicionin e katërt të Konkursit Ndërkombëtar për Fotografët e rinj “Sotiri 2011”. Ekspozita e këtij viti u organizua në bazë të konceptit të fotografes franceze Anouck Durand me titull “Propaganda intime: Albumi i familjes”.
Këtë vit u bënë pjesë e konkursit të organizuar në Korçë 15 artistë nga 11 shtete të botës, të cilët me veprat e tyre sollën tendencat e ndryshme, që shënojnë ecjen e fotografisë bashkëkohore sot në botë. Tematikat dhe tendencat e larmishme si: fotografia dokumentare, fotografia dokumentare e një realiteti të krijuar, fotografia onirike, fotografia konceptuale dhe fotografia e ndërthurur me videon e bëjnë Çmimin “Sotiri” gjithnjë e më të rëndësishëm, për prurjen e risive në fotografi dhe artet pamore në Shqipëri.