Duke filluar nga data, 06.07.2023 e në vazhdim territori i Bashkisë Korçë pritet të përfshihet nga temperatura të larta të cilat përbëjnë shkak për rënien e zjarreve në banesa, biznese, pyje, kullota etj. Për këtë paralajmërojmë të gjithë qytetarët që të kenë kujdes në hedhjen e mjeteve të ndezura në tokë ose ndezjen e zjarreve në mjedis, në mënyrë që të evitojnë rënien e tyre, si dhe dëmet që mund të shkaktojnë. Për shkaktarët e rënies së zjarreve do të merren masat që parashikon Kodi Penal i Republikës së Shqipërisë, në nenet e mëposhtme:
Neni 151 Shkatërrimi i pronës me zjarr
Shkatërrimi apo dëmtimi me dashje i pronës me zjarr dënohet me gjobë ose me burgim deri në pesë vjet. Kur nga vepra penale janë shkaktuar pasoja të rënda materiale, dënohet me burgim deri në dhjetë vjet. Kur janë shkaktuar pasoja të rënda për jetën e shëndetin e njerëzve, dënohet me burgim nga pesë deri në pesëmbëdhjetë vjet.
Neni 206/a, Shkatërrimi me zjarr i pyjeve dhe i mjedisit pyjor
(Shtuar me ligjin nr. 10 023, datë 27.11.2008; ndryshuar fjalët në paragrafin e parë, të dytë dhe të tretë me ligjin nr. 144, datë, 2.5.2013).
Shkatërrimi apo dëmtimi me dashje, me pasoja të rënda materiale, i fondit pyjor, i fidanishtes pyjore, grumbullit pyjor ose i çdo njësie të ngjashme me to, me zjarr, dënohet me burgim nga pesë deri në tetë vjet. Po kjo vepër, e kryer me qëllim ndryshimin e kategorisë dhe destinacionit të tokës, dënohet me burgim nga pesë deri në pesëmbëdhjetë vjet.
Po kjo vepër, kur ka shkaktuar pasoja të rënda për pronën, shëndetin ose jetën e njerëzve apo shkakton dëme të rënda dhe të zgjatura në kohë ndaj mjedisit apo zonave të mbrojtura, dënohet me burgim nga dhjetë deri në njëzet vjet.
Neni 206/b Shkatërrimi nga pakujdesia me zjarr i pyjeve dhe i mjedisit pyjor
(Shtuar me ligjin nr. 10 023, datë 27.11.2008; ndryshuar fjalët në paragrafin e parë dhe të dytë me ligjin nr. 144, datë, 2.5.2013).
Shkatërrimi apo dëmtimi nga pakujdesia, me pasoja të rënda materiale, i fondit pyjor, i fidanishtes
pyjore, i grumbullit pyjor ose i çdo njësie të ngjashme me to, me zjarr, dënohet me burgim nga dy deri në pesë vjet.
Po kjo vepër, kur ka shkaktuar pasoja të rënda për pronën, shëndetin ose jetën e njerëzve apo shkakton dëme të rënda dhe të zgjatura në kohë ndaj mjedisit apo zonave të mbrojtura, dënohet me burgim nga tre deri në tetë vjet.
Shpresojmë të kemi bashkëpunimin dhe mirëkuptimin e të gjithë qytetarëve për të parandaluar dhe shuar çdo vatër zjarri që mund të shfaqet në territorin e Bashkisë Korçë. Për çdo rast rënie zjarri ju lutemi të kontaktoni në numrat:
128 Shërbimi Zjarrfikës;
112 Shërbimi i Emergjencës;
129 Policia e Shtetit