Korça është një nga qytetet më shumë të vizituara në Shqipëri, sidomos gjatë fundjavave dhe ditëve të festave ku rezervimet e hoteleve dhe bujtinave në qytet dhe fshatra bëhen disa muaj para. Flukset e larta të turizmit kanë rritur nevojën për ndërtimin e hoteleve dhe bujtinave të reja të cilat sa vijnë e shtohen. Si rezultat i zhvillimeve pozitive në turizëm dhe bujqësi, vitin e kaluar Korça u rendit me konsumin më të lartë për familje pas Tiranës. Shpenzimet e familjeve në Korçë janë rritur me ritmet më të shpejta në raport me qarqet e tjera. Shkak për këtë rritje është bërë një model ekonomik rajonal që bashkia ka ndërmarrë ndër vite për të zhvilluar turizmin në mënyrë të organizuar.
