Muzeu Kombëtar i Artit Mesjetar, më i veçanti dhe një ndër më të vizituarit në Shqipëri, ekziston sot falë kontributit të jashtëzakonshëm të Theofan Popës, i cili me sakrifica dhe shumë dashuri shpëtoi nga shkatërrimi diktatorial me mijëra ikona dhe objektet të tjera liturgjike, me anë të të cilave shkruhet sot historia jonë e artit. Ekspozita e çelur në kuadër të Ditës Kombëtare të Trashëgimisë Kulturore prezantoi 7 ikona të autorëve të ndryshëm, tepër të mirënjohur, të identifikuar prej studiuesit të artit bizantin Theofan Popa, i cili nxorri në fokus vlerat e padiskutueshme të trashëgimisë sonë kulturore.
