Në Ditën Kombëtare të Trashëgimisë Kulturore, Muzeu Kombëtar i Artit Mesjetar prezantoi ekspozitën Restaurime me ikona të fondit të këtij muzeu të paekspozuara më parë për publikun.
Fondi i pasur, puna e përkushtuar në vite e restauratorëve dhe punonjësve të këtij muzeu si edhe ndërtimi i godinës së re moderne në vitin 2016 kanë bërë që MAM të jetë nga muzeumet më të mira në rajon dhe një vlerë e çmuar e trashëgimisë sonë kombëtare. Muzeu Kombëtar i Artit Mesjetar i çelur 40 vjet më parë ka në fondin e vet 8000 objekte ndër të cilat 6500 ikona. Në këtë muze ka vepra nga autorë anonim të shekullit XIII-XIV dhe autorë të tjerë të mirënjohur si Onufri, Onufër Qiprioti, Shpataraku, Jeromonaku, vëllezërit Zografi etj.