Tempulli i Artit në Korçë shndërrohet me investimin e qeverisë shqiptare në një teatër modern, i cili i përgjigjet kërkesave dhe standarteve të kohës. Ndërhyrja në pjesën e skenës dhe të ambjenteve ndihmëse të saj është kryesisht në aspektin ristrukturues përsa i përket rifiniturave, të cilat ishin të degraduara, por dhe në drejtim të rritjes së numrit të hapësirave ndihmëse për aktorët e deputuesit, duke e pasuruar me dhoma të reja përgatitore dhe grimi. Trajtimi i interierit të sallës është realizuar me materiale të çertifikuara, që plotësojnë parametrat akustike sikurse dhe komoditetin e spektatorit. Ndërhyrja në hollin e teatrit është po aq radikale sa edhe tek salla. Janë ndërtuar shkallë të reja, njëra prej të cilave është konceptuar monumentale me rampa të gjera dhe me lucionar sipër saj, i cili ia shton magjinë dinamikës së shkallës. Të gjitha impiantet e kondicionimit , ngrohje – ftohjes, elektrikut, audio-video, janë parashikuar me parametra bashkëkohorë. Në pjesën e pasme të teatrit është ndërtuar teatri i kukullave, me kapacitet 91 spektatorë. Teatri i kukullave u realizua duke shfrytëzuar pjesërisht objektin ekzistues, nëpërmjet ndërhyrjes në strukturën e dyshemesë së saj. Ndërsa pjesa e hollit shfaqet si strukturë e re, që do t`i bashkëngjitet ekzistueses. Kjo, do të krijojë mundësinë që edhe fëmijët të kenë skenën e tyre.Trajtimi i fasadës kryesore është konceptuar me frymën metaforike arkitektonike të simbolikave të teatrit, e "Gëzuara" dhe e "Mërzitura", të cilat mbartin në vetvete simbolikën e komedisë, dramës dhe tragjedisë.
