“Skulptura e Parkut” në Korçë në kuadër të programit “Korça Park 2016”, është një ndër eventet kulturore më të shumëpritur në këtë stinë. Korça është qyteti i parë dhe i vetmi në Shqipëri që prej disa vitesh zhvillon simpoziumin e sklupturave. Falë suksesit ndërkombëtar të edicioneve të kaluara edhe këtë vit,qyteti i Korcës i hap dyert edicionit të 7-të të Simpoziumit Ndërkombëtar të Skulpturës nga data 1 deri 11 korrik 2016, nën kujdesin e veçantë të kryebashkiakut Sotiraq Filo dhe me mbështetjen e Ministrisë së Kulturës. Në këtë edicion do të marrin pjesë 6 artistë , 4 të huaj dhe 2 shqiptarë , të afirmuar në arenën ndërkombëtare të artit bashkëkohor, duke realizuar kështu një investim me skulptura të reja të gdhendura në gur dhe në dru me karakter monumental modern, të cilat do ti bashkangjiten koleksionit të veprave paraardhëse.
Artistët pjesëmarrës në këtë event janë:
Nilhan Sesalan Turqi
Christos Lanitis Qipro
Francesca Bernardini Itali
Chiu Tai-Yang Taiwan
Vladimir Topi Shqipëri
Ardit Beli Shqipëri
Përkrah Qendrës së Artit dhe Kulturës, këtë vit i bashkangjitet këtij simpoziumi edhe Qëndra Publike e Formimit Profesional Korçë, të cilët do të punojnë së bashku me artistët duke ndihmuar dhe në të njëjtën kohë duke realizuar në gurin korçar elemente të traditës. Iniciativa shërben për të promovuar kulturën dhe zanatin tek brezat e rinj, nëpërmjet ndërthurjes së ndryshimit të mentalitetit në stilistikë me gjuhë të larmishme, duke treguar se Arti nuk njeh kufij. Kjo është një ngjarje e rëndësishme për historinë e artit shqiptar dhe për promovimin e vlerave të qytetit të Korçës.