Zërat e bukur të fëmijëve korçarë kanë çelur siparin e edicionit të 49 të Festivalit për Fëmijë, për të parën herë në skenën e Pazarit të Korçës. Ndërthurja harmonike e këtij ansambli të vërtetë vlerash historike dhe monumentale me interpretimet fëminore plot pasion sollën një atmosferë të gëzueshme për publikun. Nën kujdesin e veçantë të Qendrës së Artit dhe Kulturës, rreth 100 fëmijë u prezantuan me krijimet më të mira të autorëve më me emër të muzikës shqiptare. Gërshetimi i këngëve me kërcimet dhe personazhet e animuar shtuan më së miri shkëlqimin dhe harenë. Përveç pasurimit të jetës kulturore të fëmijëve, festivali jep një kontribut të rëndësishëm në zbulimin e talenteve të reja, si dhe në edukimin artistik të tyre.
Çmimet fituese në Fesivalin e Këngës për Fëmijë 2016
Dy Çmime Speciale : Erika Ahmeti dhe Isidora Mano
Dueti më i Mirë : Enxhi dhe Xhoi Mançe
Vokali më i Mirë: Eno Gjoni
Performanca më e Mirë: Keris Babliku
Interpretimi më i Mirë: Kethrin Alolli
Fabula më e Bukur : Kënga “Qukapiku” tekst dhe muzikë M. Jasi
Mesazhi më i Mirë: Kënga “Stop Dhunës” tekst dhe muzikë A. Qoshe
Çmimi i Madh: Kënga “Fluturim ëndrrash” tekst J. Babliku, muzikë D. Jano, këndoi Keris Babliku
Njëkohësisht u dhanë çmime mirënjohjeje për fëmijët që merrnin pjesë për të disatën herë në festival, si dhe çmime për debutim iu dhanë fëmijëve të vegjël të cilët merrnin pjesë për herë të parë me qëllim inkurajimin e tyre në të ardhmen.