Është organizuar në ambientet e bibliotekes “Thimi Mitko” takimi i radhës në kuadër të lëvizjes civile “Ta Pastrojmë Shqipërinë”, lëvizje e cila ka për qëllim të mobilizojë të gjithë shqiptarët të bashkohen në një aksion vullnetar një ditor me qëllim pastrimin e vendit nga mbeturinat që janë të hedhura në të gjitha ambientet publike ku ne jetojmë. Në këtë takim kanë qënë të pranishëm drejtues të institucioneve të ndryshme në qytetin e Korçës, të cilët vlerësuan këtë iniciativë dhe shprehën gadishmërinë e tyre maksimale për tu bashkuar në këtë nismë qytetare të rëndësishme për qytetin dhe vendin tonë. E pranishme në këtë takim Zv.kryetarja e Bashkisë Korçë Benila Themeli shprehu mbështetjen maksimale nga ana e bashkisë dhe theksoi se është e rëndësishme jo vetëm të pastrojmë qytetin por mbi të gjitha të pastrojmë mentalitetin njerëzor për ta konsideruar mjedisin si shtëpi të të gjithëve e për ta mbajtur atë sa më pastër. “Ta Pastrojmë Shqipërinë” në datë 21 nëntor 2014 ju bën thirrje të gjithë qytetarëve korçarë të bashkohen për një qytet më të pastër.
