Bashkia Korçë, Qendra e Artit dhe Kultures “Vangjush Mio” në bashkëpunim me Shoqatën e Artistëve Figurativë të qytetit të Korçës kanë organizuar edhe këtë vit Koloninë Ndërkombëtare të Artistëve Figurativë “Ditët e Mios”. Në këtë edicionin të shtatë të Kolonisë “Ditët e Mios” morën pjesë 20 piktorë, jo vetëm korçarë por edhe piktorë nga të gjitha trevat shqipfolëse. Koha për pjesëmarrësit në këtë koloni është 4 ditë gjatë të cilave piktorët realizojnë punimet e tyre në qytetin e Korçës dhe rrethinat e tij. Ky eveniment ka si qëllim promovimin e vlerave natyrore, kulturore dhe artistike të qytetit tonë si dhe të pikave turistike të Voskopojës, Dardhës etj. Të gjithë piktorët pjesëmarrës në përfundim të kolonisë pasurojnë fondin e Galerisë së Arteve “Guri Madhi” me një prej veprave të tyre. Ekspozita me punimet e këtyre piktorëve u çel sot në mbremje në ambientet e Qendrës Kulturore duke mbledhur së bashku dashamirës të artit figurativ e piktorë. Për piktorët Korça mbetet një destinacion frymëzues e mikpritës. Ky aktivitet i cili tashmë është shndërruar në një traditë për qytetin tonë arrin nga viti në vit të vendosë ura të reja komunikimi mes artistëve por mbi të gjitha të promovojë vlerat e qytetit. Ky aktivitet u përshëndet edhe nga kryebashkiaku Sotiraq Filo i cili i përgëzoi dhe i falenderoi të gjithë piktorët për ngjyrat e vazhdueshme që i shtojnë Korçës.
