Atmosferë e bukur festive në të gjitha rrugët dhe sheshet e qytetit me rastin e 70 vjetorit të çlirimit të Korçës. Festimet kanë filluar në zonën këmbësore me ceremoninë zyrtare dhe vendosjen e buqetave me lule tek Monumenti i Luftëtarit Kombëtar. Më pas është zhvilluar një aktivitet përkujtimor me rastin e kësaj dite të rëndësishme për qytetin tonë tek Muzeu Kombëtar i Arsimit ku Akademiku Alfred Uçi, pjesëtar i Brigadës që çliroi qytetin mbajti një fjalë përshëndetëse. Të pranishëm në këtë përvjetor të 70 të çlirimit të Korçës kanë qënë zv. Kryeminister i Shqipërisë Niko Peleshi, Kryebashkiaku Sotiraq Filo, deputetë të Qarkut Korçë, drejtues dhe përfaqësues të institucioneve si edhe veteranë te LANÇ, të cilët përshëndetën e vlerësuan vlerat dhe rolin e atyre që luftuan për lirinë e atdheut. Dita vazhdoi me një koncert festiv ku Kori Lyra, artistë të teatrit A. Z. Çajupi dhe të rinj të talentuar të qytetit performuan për gjithë të pranishmit. Ditë si kjo janë shumë të rendësishme jo thjesht në historinë e një qyteti, por në krejt rifreskimin e memorjes historike të një kombi si i yni që i është dashur të luftojë e të sakrifikojë për lirinë.
