Një seri aktivitetesh me në qendër kulturën, traditen dhe artin korçar janë organizuar sot në zonën këmbësore të qytetit nën logon “Historia e qytetit tone pa biletë”. Këto aktivitete të ideuara nga grupi i studentëve të rinj “Bashkë për ide” dhe i mbështetur nga Bashkia Korçë ka shpërfaqur disa nga vlerat më të spikatura të qytetit tonë. Ekspozimi i objekteve të ndryshme arkitekturore, qeramike, artizanale, kulinarike e muzikore përgjatë zonës këmbësore por edhe vizitat falas në muzeumet e qytetit kanë tërhequr vëmendjen e qytetarëve. Aktivitetet kanë kulmuar me zhvillimin e një sfilate me veshje tradicionale korçare, me prezantimin e figurave më të njohura që e kanë çuar emrin e qytetit tonë në botë si dhe improvizimi i një balloje te viteve ’20-‘30 ashtu si organizohej dikur në Korçë. Ky aktivitet është përshëndetur nga kryebashkiaku Sotiraq Filo i cili inkurajoi dhe vlerësoi iniciativën dhe idetë e këtyre të rinjve. Aktiviteti shënoi mbylljen me një kokteil të përgatitur për gjithë të ftuarit.
