Sot është koha për Korçën!
“Është koha që t’i lëmë mënjanë gjërat e vogla që na ndajnë, dhe të punojmë së bashku për të vazhduar rrugën tashmë të nisur të transformimit europian të qytetit tonë të dashur”.
Nga fjala e kryebashkiakut Sotiraq Filo në mbledhjen e Këshillit Bashkiak
Të nderuar anëtarë të Këshillit Bashkiak!
Të nderuar kolegë të stafit të bashkisë!
Bashkëqytetarët e mi te dashur!
Në këtë ditë shumë të rëndesishme dhe emocionuese për mua, kam kenaqësi të veçantë të them disa fjalë falenderimi dhe mirënjohje që me burojnë sinqerisht sot, si djalë i këtij qyteti, si bashkëqytetari juaj.
Së pari dua të falenderoj të gjithe qytetarët, pa asnjë dallim dhe t’i siguroj se si kryetar i bashkisë, do të punoj me dashuri, ndershmëri dhe përkushtim për Korçën, shtëpinë tonë të përbashket.
Dua të falenderoj familjen time, miqtë e mi, kolegët dhe stafin për mbështetjen e vazhdueshme dhe besimin që më dhanë.
Dua të falenderoj anëtaret e Këshillit Bashkiak, me të cilet do të vazhdojmë punën për vendimarrje të rëndësishme të lidhura me zhvillimin e qytetit.
Dua të falenderoj në mënyrë të veçantë paraardhësin tim, Niko Peleshi i cili për mëse 6 vjet në pozicionin e kryetarit të bashkisë me vizionin, punën dhe përkushtimin e tij, i hapi Korçës një rrugë të re zhvillimi dhe na karikoi të gjithëve me besimin se nëse ëndrrat ushqehen me dashurinë për qytetin dhe punën e palodhur, çdo gjë është e mundur.
Të dashur bashkëqytetarë!
Detyrën time si kryebashkiak i qytetit do ta filloj me realizimin e projekteve të rëndësishme të cilat do të sjellin përmirësime të ndjeshme në infrastrukturë dhe në cilësinë e jetës të qytetareve korçarë.Kam premtuar ne fushatën time elektorale se “Korça do te jetë qyteti me infrastrukturën më moderne në Shqipëri” . Rikonstruksioni i plotë i Parkut Rinia, Rikonstruksioni i Sheshit para Teatrit, Rikonstruksioni i Fasadave të Pazarit të Vjetër dhe shumë projekte të tjera do ta kthejnë shumë shpejt në realitet këtë premtim. Korçarët do ta ndjejnë mbështetjen e bashkisë, jo vetëm në infrastrukturën e përmirësuar por edhe në zbutjen e varfërisë, krijimin e mundësive për punësim dhe strehim, në më shumë kujdes për shtresat në nevojë, per të moshuarit, për personat me aftësi të kufizuar dhe çdo qytetar të këtij qyteti.Korça do të jetë një qytet me mundësi te shtuara për të rinjtë, dhe fëmijët.Korça do te jete qyteti i ngjarjeve të mëdha kulturore kombëtare dhe ndërkombëtare. Do te marrë udhe që këtë vit Festivali Mbarëkombetar i Komedisë dhe shumë projekte të tjera të përmasave kombëtare e ndërkombëtare. Të gjitha këto Bashkia e Korçës do t’i bëjë të mundura duke punuar së bashku me qytetarët si edhe me mbështetjen e qeverisë e cila është padyshim një model i ri për Shqipërinë, duke e orjentuar punën në zhvillimin e qyteteve shqiptare, duke menduar jo thjesht për rrugët qe lidhin qytetet por sidomos për njerëzit në të dy krahët e saj.Kam besim të plotë se jemi në rrugën e duhur, kemi mbështetjen e duhur, kemi vizionin e duhur të zhvillimit dhe na duhet punë dhe përkushtim për të bërë më të mirën për Korçën tonë!
Edhe njëherë, ju faleminderit të gjithëve!
Sotiraq Filo