Ka vite tashmë që Korça njihet si qyteti i festave, jo vetëm nga banorët e saj por edhe nga vizitorë të shumtë që zgjedhin me dëshirë të jenë pjesë e festave tona të mëdha dhe të bukura. Datat e festave të organizuara nga bashkia e qytetit me qëllim gjallërimin e jetës në qytet dhe zhvillimin e turizmit, publikohen në kalendarë dhe publikime të veçanta, dhe shpesh ndodh që vizitorët hershëm t’i planifikojnë datat kur duhet të mos mungojnë në Korçë. E nëse ju ndodh që të jenë njëherë pjesë e tyre, nuk ka dyshim që do të kthehen edhe vitin tjetër. E kështu nga viti në vit numri i vizitorëve që vijnë në Korçë për shkak të festave është rritur. Edhe korçarët ndjehen mjaft mirë. Pronarët e hoteleve kanë shtuar klientët, madje kanë arritur të kenë edhe klientët e përhershëm të këtyre datave, restorantet kanë pasuruar menutë e tyre dhe kanë përmiresuar shërbimet, sepse numri i klientëve tashmë ka rritje të ndjeshme sidomos në datat e festave. Banorët e qytetit shijojnë ditë të bukura me gjallëri dhe me shumë dëshirë presin miq dhe të afërm që jetojnë në qytete të tjera t’i bashkohen festave të qytetit të tyre. Vitet vërtetuan se “Korça, qyteti i festave” nuk ishte thjesht një slogan, por një drejtim i ri që i dha hov zhvillimit ekonomik të qytetit të Korçës, një mundësi e shtuar jo thjesht për argëtim por sidomos për promovimin e vlerave më të spikatura të traditës korçare dhe të vetë Korçës si destinacion. Qyteti gëzon dhe fton dhe të tjerë të gëzojnë bashkë me të. Mjaft të dish datat që nuk duhen humbur në Korçë dhe i jep vetes mundësinë të shijosh një atmosferë fantastike që nuk e gjen askund në Shqipëri. Ndonëse siç thonë të gjithë ata që vizitojnë qytetin tonë: Korça nuk është e bukur vetëm në ditët e festave të saj të mëdha por në çdo ditë të çdo stine. Është qyteti që krenohet me vlerat që mbart nga e shkuara e tij, ndërton vlera të reja dhe aspiron një të nesërme padyshim më të mirë.
