Tradita vazhdon
Festivali Ndërkombëtar i Karnavaleve ka çelur në muajin qershor sezonin turistik të qytetit të Korçës.Edhe këtë vit, karnavalet sollën paradën muzikore, gazin dhe harenë e maskave si dhe koloritin e kostumeve të shumta. Çdo grup pjesëmarrës është paraqitur me fabulën e vet të shoqëruar me koreografi dhe skenar të veçantë. Krahas grupeve nga Korça dhe qytete të tjera të vendit, festivali i përmasave ndërkombëtare ka sjellë edhe karnavalet nga trevat e Ballkanit. Qytetarët korçarë të veshur me maska dhe kostume ndoqën me interes deri në orët e mbrëmjes paradën e grupeve karnavaleve të organizuar përgjatë Zonës Këmbësore. Karnavalet i paraprijnë festave të shumta që organizohen nga bashkia gjatë sezonit veror. Kjo festë mirëpritet nga banorët e qytetit dhe tërheq vëmendjen e turistëve vendas dhe të huaj, duke rifituar statusin e festës simbol të qytetit të Korçës.