Me iniciativën e Bashkisë Korçë në partneritet edhe me USAID, është firmosur Memorandumi i Marëveshjes midis bashkisë dhe Komisionit Këshillimor Qytetar Korçë. Komisioni Këshillimor Qytetar (KKQV) është grupim vullnetar me përfaqësim të gjerë me qytetarë që kanë vizion dhe duan të mundësojnë ndryshime pozitive në qytetin e tyre i cili do të shërbejë si organ këshillimor për Bashkisë. Ai do të jetë gjithëpërfshirës dhe i pavarur nga kontrolli prej njësisë vendore. KKQV-të do të përbëhet nga drejtues dhe përfaqësues të OJQ-ve vendore, bizneseve, rinisë, grave, grupeve të margjinalizuara, etj. Komisioni Këshillimor Qytetar Korçë ka synim të bëjë të mundur trajtimin e sa më shumë tematikave dhe problemeve me rëndësi për komunitetin e tyre. KKQV do të mblidhet rregullisht për çështje që lidhen me buxhetin, paketën fiskale, ofrimin dhe cilësinë e shërbimeve vendore, planifikimin e territorit, si dhe përparësitë dhe projektet e bashkisë. Në diskutimet e tyre do të ftohen të marrin pjesë edhe punonjës nga njësia e qeverisjes vendore. Firmosja e marëveshjes së mirëkuptimit, zyrtarizon partneritetin ndërmjet bashkisë dhe komisionit qytetar. Nga ana e tij Kryetari i bashkisë Sotiraq Filo, theksoi se në këto vite bashkia ka punuar për të qënë transparente dhe sa më afër kërkesave dhe nevojave të qytetarëve edhe nëpërmjet nismave të tilla si “Buxhetimi me Pjesmarrje”, ku vetë qytetarët raportojnë problematikat e ndryshme në lagjet ku ata banojnë,japin ide dhe informohen për punët publike të bashkisë në qytet duke u bërë në këtë mënyrë edhe bashkëhartues të buxhetit të bashkisë. Ashtu si në keto vite edhe në vazhdim, u shpreh Filo, bashkia do ti japë përparësi tërheqjes së ideve dhe transparences me qytetaret duke e konsoliduar edhe më tepër atë me këtë marëveshje nëpërmjet së cilës zyrtarizohet partneriteti dhe bashkëpunimi midis bashkisë dhe qytetarëve vizionarë të cilët do të punojnë së bashku me përkushtim për përmirësimin e standarteve të jetesës në qytet. Në mbyllje të këtij takimi kryebashkiaku u shpreh se ndjehej i lumtur nga fakti se këta njerëz edhe pse me ngjyra të ndryshme partiake , ulen në të njëjtën tryezë për të diskutuar idetë dhe projektet që do të përmirësojnë standartet dhe kushtet e jetesës në shtepinë tonë të përbashkët, qytetin ku te gjithë kemi zgjedhur të jetojmë.
