Edhe këtë vit shifra në rritje
Mijëra pjesëmarrës, muzikë e zgjedhur, birrë dhe produkte tradicionale, argëtim deri në orët e para të mëngjesit. Kështu mund t’i përshkruajmë edhe këtë vit 5 netët e Festës së Birrës në Korçë. Festa më e madhe verore në Shqipëri edhe këtë verë i theu rekordet me numrin e larte të frekuentuesve të saj nga brenda dhe jashtë Shqipërisë duke shënuar kulmin e sezonit turistik për qytetin e Korçës. E kthyer tashmë në traditë Festa e Birrës e kthen prej 7 vitesh qytetin në një arenë të gëzueshme festimesh me vizitorë të shumtë vendas dhe të huaj. Çelja e festës është bërë nga kryetari i bashkisë Niko Peleshi si edhe ambasadori gjerman në Tiranë Hellmut Hoffman. Të pranishëm në ditët e festës kanë qënë edhe ambasadorja çeke, ambasadori hollandez si edhe shumë përsonalitete të fushave të ndryshme vendas dhe të huaj. Këngëtarë dhe grupe të njohura muzikore kanë qënë pjesë e spektaklit të madh muzikor që edhe këtë vit shoqëroi festën. Surpriza që afroi spektakli këtë vit ishte prezenca e kitaristit të grupit legjendar të rokut Guns N’Roses, Ron Bumblefoot Thal, mundësuar nga Ambasada Amerikane, i cili së bashku me një nga zërat më potentë të muzikës së sotme shqiptare Eugent Bushpepa, i bëri nje mbyllje spektakolare festës. Veç birrës, muzikës dhe produkteve tradicionale pjesëmarrësit në festë kanë zgjedhur veshjen dhe kujtimin e tyre nga festa mes suvenireve të këtij viti si edhe kanë argëtuar fëmijët në këndin e veçantë të ngritur për këtë qëllim. Për herë të parë pranë ambienteve të festës është ndërtuar edhe një kamping me infrastrukturën e nevojshme pritëse për të gjithë vizitorët që kanë zgjedhur të akomodohen me çadra.