Bashkia Korçë në kuadër të programit “Bashkia për qytetarët” ka zhvilluar procesin e përgatitjes së projekt buxhetit për investimet në qytet. Në trajtën e bashkëpunimit dhe bashkëhartimit të projektbuxhetit të investimeve, janë zhvilluar takimet e hapura me qytetarët sipas projektit “Buxhetimi me pjesëmarrje”, i cili është një proçes renditje prioritetesh dhe vendimmarrje përmes të cilit qytetarët dhe bashkia vendosin së bashku për investimet publike. Takimet janë zhvilluar në të gjitha lagjet e qytetit. Gjatë këtyre takimeve banorët kanë bashkëbiseduar me Zv.Kryetarin e bashkisë Sotiraq Filo, me të cilin kanë ndarë mendime dhe kanë propozuar ide konkrete për nevojat e tyre për investimet publike në lagjen ku ata banojnë. Ky model i hartimit të buxhetit konsiderohet i rëndësishëm nga Bashkia Korçë pasi përveç faktit se Bashkia bën transparencën me qytetarët për investimet edhe vetë qytetarët thonë fjalën e tyre se ku duhet të shkojnë ato.
