Në 30 dhjetor, qindra fëmijë të veshur babagjysh, parakaluan në Zonën e re Këmbësore të qytetit së bashku me babagjyshin dhe ndihmësit e tij të vegjël, duke krijuar një atmosferë të veçantë dhe të gëzueshme festive me rastin e festave të fundvitit.
Tashmë Parada e Babagjyshëve është kthyer në një traditë për qytetin e Korçës. Paradës së Babagjyshit iu bashkuan edhe shumë fëmijë të tjerë dhe qytetarë korçarë, për të cilët babagjyshi shpërndau kartolina urimi, ëmbëlsira dhe lodra.
Parada u mbyll me foton tradicionale të dhjetra babagjyshëve të vegjël dhe vogëlushëve të qytetit në shkallët e katedrales.
Në këtë ditë te bukur festive për të gjithë fëmijët e qytetit, argëtim të veçantë sollën edhe disa animatorë të Shoqërisë të Animatorëve Shqiptarë, prezenca e të cilëve u mundësua në Korçë nga UNDP.
Të veshur me kostumet e personazheve të dashura për fëmijët ata organizuan lojra argëtuese në të cilat përfshinë të gjithë vogëlushët korçarë të pranishëm në Zonën Këmbësore.