Më shumë se gjysma e fushës së mbetjeve urbane pranë qytetit të Korçës është mbuluar dhe është mbjellë me bar.
Në pranverë në vend të saj do të ketë një kodër të gjelbëruar duke zgjidhur kështu njëherë e mirë problemin e grumbullimit të mbeturinave sipas standarteve bashkëkohore europiane për qytetin e Korçës dhe më gjerë.
Lajmin e ka bërë të ditur kryebashkiaku i Korçës Niko Peleshi gjatë një inspektimi që ka bërë në fushën e mbetjeve urbane të qytetit. Mbulimi i fushës është pjesë e masave imediate të ndërmarra për përmirësimin e gjendjes aktuale.
Ndryshimi tërësor i kësaj fushe bëhet i mundur si pjesë e Projektit të madh të Menaxhimit të Mbetjeve të Ngurta në Qarkun e Korçës, projekt që kap shifrën 12,5 milion euro.
Ky projekt parashikon ndërtimin e një vendgrumbullimi për mbeturinat (landfill) në Maliq, duke zgjidhur përfundimisht problemin e grumbullimit të mbetjeve urbane për 30 bashki dhe komuna të Qarkut Korçë.
Me përfundimin e landfillit të Maliqit fusha e grumbullimit të mbetjeve pranë qytetit të Korçës do të mbyllet plotësisht duke u kthyer ne nje kodër të gjelbëruar.
Bashkia e Korçës është bashkia pilot në Shqipëri në zgjidhjen e problemit të menaxhimit të mbetjeve urbane në mënyrë rajonale.Si pjesë e këtij projekti madhor qytetit të Korçës i janë shtuar edhe 2500 kazanë për grumbullimin e mbeturinave me kapacitet 120 litra , 120 kazanë me kapacitet 240 litra, 43 kosha publikë me kapacitet 40 litra si edhe 125 kosha me katër ndarje të cila do të shpërndahen shumë shpejt në shkollat e qytetit.
Për të përmirësuar situatën mjedisore dhe për të ndërtuar një vend depozitim sanitar, Bashkia Korçë ndërmori këtë nismë e cila u bë realitet falë mbështetjes financiare të Bankës Gjermane për Zhvillim KFW