Në 2-3 prill drejtues të bashkive dhe të qeverisjes vendore dhe lidera të biznesit nga rajoni jonë dhe SHBA-së u mblodhën së bashku në BROWN FORUM në Opatija të Kroacisë për të diskutuar se si njësitë vendore mund të promovojnë rritjen ekonomike, të mundësojnë mbështetje për bizneset lokale si dhe të marketojnë burimet e bashkive dhe përfitimet për investitorët potenciale.
Cështjet kryesore që u diskutuan ishin : identifikimi i avantazheve lokale, lehtësia e të bërit biznes (lehtësimi lokal), përfshirja e komunitetit,ndërtimi i konsensusit për investimet dhe rritjen ekonomike, gjetja e partnereve për investime. Ky forum u organizua nga qeveria kroate dhe nga Ambasada e SHBA në Kroaci. Me ftesë të Presidentit të Republikës së Kroacisë dhe të Ambasadës Amerikane në Kroaci, në këtë fórum mori pjesë kryetari i Bashkisë korçë, Z. Niko Peleshi.
Nga paneli ku ai mori pjesë, prezantoi para pjesëmarrësve përvojën e Bashkisë Korçë për identifikimin e avantazheve konkurruese dhe potencialeve të qytetit gjë e cila u bë baza për të zhvilluar një vizion të ri dhe një strategji afatmesme për mundësimin e rritjes ekonomike lokale.
Duke u fokusuar në zhvillimin dhe promovimin e turizmit si një mundësi alternative e bazuar në potencialet e qytetit, ai analizoi rrugën e ndjekur për ta shndëruar qytetin e Korçës në një qënder të turizmit alternativ dhe atij të eventeve, gjë që i solli këtij qyteti edhe cmimin e turizmit për vitin 2010. 10% e numrit total të turistëve vijnë në Korçë vetëm për të ndjekur eventet që organizohen (sipas organizatës botërore të turizmit).
Ai theksoi se ka gjithmonë një mundësi për zhvillim, kur mbështetesh në avantazhet konkurruese dhe në potencialin unik të një qyteti. Qeverisja vendore dhe vizioni i saj mund ti shërbejnë zgjimit të iniciativave të biznesit dhe ti paraprijnë zhvillimit ekonomik , lokal.