Koleksioni i Skulpturave të Parkut unikal në Shqipëri dhe me gjerë
Për të katërtin vit rradhazi Bashkia e qytetit të Korçës ka mirëpritur 8 skulptorë nga vende të ndryshme të botës, të cilët morrën pjesë në Simpoziumin Ndërkombëtar “Skulptura e Parkut Korça 2011”.
Skulptorët e ardhur nga Turqia, Franca, Rumania, Portugalia, Spanja, Zelanda e re dhe Shqipëria i shtuan 8 skulptura të reja koleksionit unikal të skulpturave të parkut në gur, të cilat prej disa vitesh zbukurojnë Parkun “Rinia” të qytetit të Korçës.
Për dy javë skulptorët kanë punuar në ambientet e hapura të parkut të qytetit duke tërhequr vëmendjen e qytetarëve të shumtë.
Organizimi i simpoziumeve të ngjashme është një traditë e njohur në shumë vende të botës. Korça është qyteti i parë në Shqipëri që ka mirëpritur çdo vit skulptorë nga e gjithë bota që realizojnë veprat e tyre, duke i shtuar qytetit të Korçës një vlerë të spikatur qe lidhet edhe me traditën e hershme të punimit të gurit në këtë qytet.