Niko Peleshi bën publike një nga pikat e programit të tij elektoral
Kryebashkiaku Niko Peleshi ka prezantuar para banorëve të Lagjes 16 një pikë të rëndësishme të programit të tij elektoral për katër vitet e ardhshme: Brenda katër viteve do të përfundojë rikonstruksioni i plotë i të gjitha rrugëve dhe blloqeve të banimit në të gjitha lagjet e qytetit të Korçës.
Ky premtim shumë i rëndesishem për banorët e qytetit të Korçës u bë i njohur nga kryebashkiaku gjatë inspektimit të punimeve për rikonstruksionin e plotë të Lagjes 16.
Bashkia Korçë ka investuar 220 milion lek për rikonstruksionin e plotë të kësaj lagjeje dhe punimet do të përfundojnë brenda muajit prill.
Niko Peleshi ka theksuar se në kuadrin e Programit të Rigjenerimit të Rrugëve dhe Sipërfaqeve të Gjelbra që po zbatohet aktualisht në shumë pjesë të qytetit, Bashkia Korçë ka investuar edhe në shumë lagje periferike, prej dhjetra vitesh të harruara, duke bërë të mundur transformimin rrënjesor të këtyre zonave me rrugë dhe sheshe të rikonstruktuara, lulishte, stola, kënde lojërash për fëmije dhe ndriçim publik. Brenda katër viteve të ardhshme të gjitha lagjet qendrore dhe periferike të qytetit të Korçës do të kenë një fytyrë të re, ka theksuar ai.