Projektojme së bashku qytetin e të gjithë qytetarëve
Në stenda të veçanta të vendosura në qendër të Korçës, qytetarët korçarë kanë shkruar dhe ngjitur mbi hartën e qytetit mendimet dhe propozimet e tyre për zhvillimin e qytetit të Korçës në katër vitet në vijim. Kjo është pjesë e procesit tashmë të filluar për shkrimin e programit të katër viteve së bashku me qytetarët, ndërmarrë nga kryebashkiaku Niko Peleshi i cili kandidon për një mandat të dytë në krye të Bashkisë të Korçës. Për disa ditë me rradhë në vende të ndryshme në qytet, qytetarëve korçarë do t’ju jepet mundesia të shprehin idetë dhe propozimet e tyre për Korçën në katër vitet në vijim. Kjo mënyrë e marrjes të mendimit qytetar pason takimet e zhvilluara me banore të 18 lagjeve të qytetit, përfaqësues të grupeve etnike, shoqatës të biznesit, bordeve të prindërve në shkolla etj.
Jo pa qëllim fletet mbi të cilat qytetarët kanë shkruar mendimet e tyre ishin rozë dhe blu. Qëllimi ka qënë për të theksuar idenë tonë se qyteti është i të gjithë qytetarëve, pavarësisht bindjeve dhe përkatësisë së tyre politike. Ashtu si në këto katër vite edhe në katër vitet në vijim bashkia nën drejtimin e kryebashkiakut Niko Peleshi do të punojë për qytetin e qytetarëve, qytetin që projektohet dhe ndërtohet së bashku me ta.
Në ditët në vijim stendat për mbledhjen e mendimeve të qytetarëve do të vendosen në qendër të qytetin dhe në Parkun “Rinia”.