Kryebashkiaku Niko Peleshi në katër vjetorin e marrjes së mandatit të tij në krye të Bashkisë së Korçës, ka zgjedhur të falenderojë stafin e bashkëpunëtorëve dhe punonjësve të institucionit të bashkisë dhe institucioneve të tjera të vartësisë për punën e mirë dhe përpjekjet e përbashkëta për drejtimin e qytetit dhe zhvillimin perspektiv të tij, një punë e frymëzuar nga një vizion i qartë dhe nga dashuria për qytetin e Korçës.
Ai ka zhvilluar një takim të ngrohtë me stafin e tij, që nga drejtuesit e deri tek punëtorimë i thjeshtë në sallën e Teatrit “Andon Zako Çajupi” të qytetit, prej nga ku ka përcjellë falenderime për mbështetjen që ata të gjithë i kanë dhënë në punën e tij për drejtimin e qytetit këto katër vite.
Duke e cilësur si një mision fisnik dhe me përgjegjësi të madhe detyrën e nëpunësit dhe punonjësit të bashkisë si institucion që qeveris qytetin, kryebashkiaku ka falenderuar të gjithë punonjësit për punën e palodhur të këtyre katër viteve, punë e frymëzuar para së gjithash nga dashuria për qytetin. Korça, ka thënë ai, historikisht ka qënë një qytet me vlera të spikatura referuar qytetarisë dhe kulturës të banorëve të saj .Këta qytetarë meritojnë të kenë më të mirën nga qeverisja e tyre vendore.